na puchho shab-e-vasl kya ho raha hai
gale men hain banhen gila ho raha hai
vo ithla ke meri taraf aa rahe hain
qayamat ka vaada vafa ho raha hai
gale par jo ruk ruk ke chalta hai khanjar
ye puura mira muddaa ho raha hai
miri be-khudi par nazar kya ho us ko
vo khud mahv-e-naz-o-ada ho raha hai
vo ham-rah le kar gae hain adu ko
zara ham bhi dekh aaen kya ho raha hai
tajahul ne un ke hamen maar daala
jab aate hain kahte hain kya ho raha hai
‘sharaf’ tum ne badnam use kar ke chhoda
yahi zikr ab ja-ba-ja ho raha hai
Leave a Reply