na puchh us ne hai kya kuchh kaha mohabbat ko
hamare samne rusva kiya mohabbat ko
hamare paas dua mangne ka vaqt nahin
ab aap aasra dega ḳhuda mohabbat ko
tu mujh ko chhoḌ to phir is tarah se chhoḌ ki main
gali gali men phirun kosta mohabbat ko
ham aise log hi zehni mariz hote hain
jo mante hain baḌa aasra mohabbat ko
hamari aankh men utre hain saat rang ke ḳhvab
hamara haq hai ki ham den dua mohabbat ko
tamam log use zindagi bulate the
kisi kisi ne kaha hadisa mohabbat ko
tumhare shahr men but the so kaam aa na sake
daraḳht hote to dete hava mohabbat ko
hamare ba.ad koi sar-parast mil na saka
yatim-ḳhane men rakkha gaya mohabbat ko
‘hasib’ us se yahi soch kar nahin milte
kahan vo rakkhega ghurbat-zada mohabbat ko
Leave a Reply