Sadique Naseem
azmat-e-fikr ke andaz ayaan bhi honge
ham zamane men subuk hain to garan bhi honge
jin sitaron ko ḳhuda maan ke puuja tha kabhi
ab unhin par mire qadmon ke nishan bhi honge
kaise rah sakti hain jannat ki faza.en shaffaf
ḳhaak uḌane ko hamin log vahan bhi honge
be-sutun azmat-e-farhad ka maz.har hai to kya
ahl-e-dil kitne hi benam-o-nishan bhi honge
dil ka.i aur bhi dhaḌke.enge mire dil ki tarah
apne qisse ba-hadis-e-digaran bhi honge
yuun to taz.in-e-gul-o-ghuncha men shamil hain sabhi
haa.e vo rang jo ab harf-e-ḳhizan bhi honge
jab shaguft-e-gul-e-badam ki rut aa.egi
ko.eTe ko nahin bhulenge jahan bhi honge
avvalin diid men hi apni nigahen kho kar
zindagi-bhar tiri janib nigaran bhi honge
ḳhud-numa.i ke liye bante ho mazlum ‘nasim’
zaḳhm khaa.e hain to kuchh un ke nishan bhi honge
Leave a Reply