na puchh dost ki kitna ḳharab hota hai
bas itna jaan zamana ḳharab hota hai
ye ishq hai na jo ye dil ki ik ḳharabi hai
ḳharabiyon ka natija ḳharab hota hai
ajab mizaj ki duniya hai ye ki is ke liye
ḳharab achchha to achchha ḳharab hota hai
huzur chhoḌiye ye amn-o-vamn ki baten
siyasi logon ka dhanda ḳharab hota hai
koi kisi bhi samay jhaT se toḌ sakta hai
umiid sab se lagana ḳharab hota hai
sharab paisa ana ḳhvab ishq ya ki suḳhan
kisi bhi shai ka ho nashsha ḳharab hota hai
udaas mat ho miyan hai ye imtihan-e-zist
is imtihan men parcha ḳharab hota hai
Leave a Reply