Na Maslahat Na Takalluf Na Inkisar Ka Hai

Masoom Ansari

na maslahat na takalluf na inkisar ka hai

saval TuTte rishton ke e’tibar ka hai

uTha le haath men patthar agar sune koi

ajiib haal mire zehn ki pukar ka hai

had-e-nigah se aage bhi manzilen hain bahut

mira irada gham-e-zat se farar ka hai

sabhi chale ga.e ghar chhoḌ kar to kya hoga

bacha.e shahr ko ye kaam shahryar ka hai

zara haTe to paḌhun main bhi vaqt ka chehra

nazar ke samne parda abhi ghubar ka hai

farogh kaise mila nafraton ko jab ki yahan

har ek aadmi ummid-var pyaar ka hai

ajiib chiiz hai ye arsa-e-tamanna bhi

jise bhi dekhiye qaidi isi hisar ka hai