Shakeel Jamali
na koi ḳhvab kamaya na aankh ḳhali hui
tumhare saath hamari bhi raat kaali hui
ḳhuda ka shukr ada kar vo bevafa nikla
ḳhushi mana ki tiri jaan ki bahali hui
zara se ḳhvab bune the ki saans phuul ga.i
qadam dukan pe rakha tha ki jeb ḳhali hui
vafa ke baare men logon ki raa.e Thiik nahin
briadri se ye ḳhatun hai nikali hui
tumhi to sar pe biTha.e hue the duniya ko
tumhi pe bhaunk rahi hai tumhari paali hui
main kaise dekhun rava-dariyon ko miTte hue
ye dagh-bel hai mere baḌon ki Daali hui
jo ahl-e-naqd-o-nazar hain idhar bhi ghaur karen
ki ye ghazal bhi hai tarkib se nikali hui
ye qafiya baḌi diqqat ke saath nazm hua
baḌe hunar se ye aurat mrs ‘jamali’ hui
Leave a Reply