na-khush jo ho gul-badan kisi ka
kya bhaae use sukhan kisi ka
gul ki mujhe kyuun kali dikhai
yaad aa gaya phir dahan kisi ka
har sang ki koh par sada hai
yaan dafn hai kohkan kisi ka
karte ho pasand vahshat-e-dil
le jaoge kya hiran kisi ka
bhuli hai saba qaba-e-gul par
dekha nahin pairahan kisi ka
ashiq hi ke jab na kaam aaya
kis kaam ka bankpan kisi ka
aa jaae kisi ki maut mujh ko
mil jaae mujhe kafan kisi ka
siine se hamara dil na le jaao
chhudvate ho kyuun vatan kisi ka
gaate hain ‘sakhi’ hi ki ghazal vo
bhata hi nahin sukhan kisi ka
Leave a Reply