Jigar Barelvi
na ḳhum-o-subu hue chuur abhi na hijab-e-pir-e-mughan uTha
abhi mast bada-parast hain abhi lutf-e-bada kahan uTha
jo huzur chin-ba-jabin hue kaha kis ne shor-e-fughan uTha
rahe ḳhair barq-e-nigah ki koi dil jala na dhuan uTha
ye kahe zamana javan hai to qadam aisa mard-e-javan uTha
jo na bar-e-ishq uTha sake to bala se tegh-o-sinan uTha
ye kahan bahar-e-jamal hai ki jahan ḳhizan na zaval hai
tiri bazm-e-naz se jo uTha vo hasin uTha vo javan uTha
jo baḌhe to jaan pe aa bane jo ghaTe to jaan pe aa bane
jise dil nasib se mil gaya ajab us ke dard-e-nihan uTha
kisi rahguzar men paḌe hain ham abas asman ki hain ranjishen
koi laakh uTha.e uThenge kya kahin paanv ka bhi nishan uTha
hai hijab-e-husn ka ye asar kisi ḳhud-parast ko kya ḳhabar
jo azal se siine men josh tha vahi ban ke shor-e-fughan uTha
kisi mai-kada men raha ‘jigar’ ki tha mahv-e-ḳhvab men raat bhar
huiin kya basharaten sub.h-dam ki uTha to zamzama-ḳhvan uTha
jo hue farishton men mashvare kare kaun ishq ki raah tai
kamar apni bandh ke jo uTha to ‘jigar’ sa mard-e-javan uTha
Leave a Reply