na karb-e-hijr na kaiffiyat-e-visal men huun
mujhe na chhediye ab main ajiib haal men huun
tamam rang-e-ibarat men soz-e-jan se mire
main husn-e-zat huun aur manzil-e-jamal men huun
mira vajud zarurat hai har zamane ki
main raushni ki tarah zehn-e-mah-o-sal men huun
abhi vasil-e-iz.har dhundhti hai nigah
abhi saval kahan hasrat-e-saval men huun
mujhe na dekh miri zaat se alag kar ke
main jo bhi kuchh huun faqat apne khadd-o-khal men huun
main ji raha huun ye mera kamal hai ‘hashri’
main apne ahd ki tahzib ke zaval men huun
Leave a Reply