na jaane kab ji tumhara bahle main tang tum se ab aa raha huun
ki jitne qisse bane nahin the ziyada us se suna raha huun
baḌa hi dushvar hai safar men bharosa qaa.em bana.e rakhna
tamam dhoke vo kha raha hai tamam dhoke main kha raha huun
yuun bhole ban ke bhi kya karoge chalo sikhate hain ik chalaki
mujhe badan tum hi apna de do badan main de ke hi aa raha huun
jo dekhna hai to dekh hi lo hai kitni asan ye mohabbat
vo mujh se pichha chhuḌa rahi hai main us se pichha chhuḌa raha huun
likhi ga.i hai na.i ibarat vo saara qissa ajiib hi hai
suna.en qissa ki jaane den ham suna raha huun suna raha huun
jo tum sunoge to bor hoge tavil hai ye hamara qissa
tavil qisse ko kar ke chhoTa miTa miTa ke suna raha huun
jo raaz khole to dekh lena hai tum se ham ko vafa ki ummid
vo baat meri bata raha hai main baat us ki bata raha huun
haan tum ko mujh se nahin rahi hai vo pahle jaisi hasin mohabbat
tum apna hissa nibha rahi ho main apna hissa nibha raha huun
na jaane kitni hi baar main ne tha tum ko ullu bana.e rakha
yaqin karoge yuun tum bhi kab tab chalo main qissa suna raha huun
to bachche kar ke ye fa.eda hai yaqin barabar bana hua hai
vo kha rahi hai tamam qasmen tamam main bhi to kha raha huun
na jaane kya hai jo jal rahi hai kahin ye apni hi chiiz to na.iin
kya aag dil men laga rahe ho haan aag dil men laga raha huun
ye baat tum ne bhi sun rakhi hai ki koi ham ko hai takta rahta
tabhi chhupa ke rakhi ho ham ko tabhi main tum ko chhupa raha huun
jo aag hoti hai tanha rahne ki aag vo tum vo laga rahe ho
ḳhuda kabhi to sunega meri ḳhuda ko apne bula raha huun
hai baat karna hi kaam mera to kaam ki baat kya hi hongi
batani thi yaar ye shurua men lo ja ke ab main bata raha huun
chhaḌi hui hai vo jang apni ki kaun jiita ki kaun haara
vo mera parda gira raha hai main us se parda haTa raha huun
Leave a Reply