Poet
na hoti bhiiḌ rindon ki to maiḳhane kidhar jaate
ye mai-noshi kahan hoti ye paimane kidhar jaate
agar insan ban jaate kabhi shaiḳh-o-barahman bhi
to ye ka.aba kahan hota ye but-ḳhane kidhar jaate
charagh-e-ḳhana se vo ban ga.e hain sham.a mahfil ki
agar aisa na hota phir ye parvane kidhar jaate
hamari bada-noshi par hua hairan kyon zahid
na hote piine vaale hi to maiḳhane kidhar jaate
chaman-zar-e-jahan men gul hi gul hote agar har su
to ye kanTe kahan rahte ye virane kidhar jaate
agar siine men dil hota na pahlu men jigar hota
kahan palti mohabbat us ke afsane kidhar jaate
tiri baton ka ai zahid agar kuchh bhi asar hota
namazi saf-ba-saf hote ye mastane kidhar jaate
agar vo apne bandon par dar-e-rahmat na va karta
to ye bande ḳhuda ke phir ḳhuda jaane kidhar jaate
siyah-baḳhti men apne bhi para.e ho ga.e ‘azam’
agar hota na ye andher begane kidhar jaate
Leave a Reply