Na Gul Se Hai Gharaz Tere Na Hai Gulzar Se Matlab

na gul se hai gharaz tere na hai gulzar se matlab

rakha chashm-e-nazar shabnam men apne yaar se matlab

ye dil dam-e-nigah men tark ke bas ja hi atka hai

bar aave kis tarah allah ab khun-khvar se matlab

ba-juz haq ke nahin hai ghair se hargiz tavaqqo kuchh

magar duniya ke logon men mujhe hai pyaar se matlab

na samjha ham ko tu ne yaar aisi jan-fishani par

bhala pavenge ai nadan kisi hushyar se matlab

na ‘chanda’ ko tamaa jannat ki ne khauf-e-jahannam hai

rahe hai do-jahan men haidar-e-karrar se matlab