na ghurur hai ḳhirad ko na junun men bankpan hai
ye mizaj-e-zindagi to baḌa hausla-shikan hai
jahan mil saken na mil ke jahan fasle hon dil ke
use anjuman na samjho vo fareb-e-anjuman hai
ye hava chali hai kaisi ki dilon ki dhaḌkanon men
na hadis-e-lala-o-gul na hikayat-e-chaman hai
nahin maslahat ki rahbar koi baat sach bata de
zara karvan se puchho jo shikast jo thakan hai
ka.i inqalab aa.e ka.i diip jhilmila.e
jo bujhi nahin hai ab tak tiri yaad ki kiran hai
main ghamon ki tirgi men nahin is qadar bhi tanha
koi mujh se duur rah kar mire dil men zau-fagan hai
nahin sab ke saath yaksan safar-e-hayat pyare
kahin rang-o-bu ke saa.e kahin dasht-e-pur-mehan hai
Leave a Reply