Na Aaya Kabhi Main Tere Aastan Par

na aayā kabhī maiñ tire āstāñ par

bhaTaktā rahā bas yahāñ aur vahāñ par

tirī yaad ne dil to raushan kiyā thā

lagāyā magar qufl merī zabāñ par

kabhī fikr-e-fardā kabhī yād-e-māzī

har ik din nayā baar mujh nā-tavāñ par

sunā.ī sar-e-anjuman jo thī tū ne

koī shaḳhs royā thā is dāstāñ par

ise shā.irī tum kaho to kaho par

kahe sher maiñ ne haiñ dil kī fuġhāñ par

‘zohaib’ ham mashaqqat se ghabrā.e kab the

magar dil dukhī hai to kār-e-ziyāñ par

Leave a Comment