Tahir Adeem
musibat sar se Talti ja rahi hai
hamari umr Dhalti ja rahi hai
kahan hai zindagi ab zindagi men
faqat ik nabz chalti ja rahi hai
musalsal bhaap ban kar uḌ raha huun
musalsal aag jalti ja rahi hai
ajab hai saneha jiine ki ḳhvahish
mire dil se nikalti ja rahi hai
ḳhafa kyon hain mire halat mujh se
hava kyon ruḳh badalti ja rahi hai
ye sansen mo.ajize men Dhal rahi hain
karamat ḳhuun men chalti ja rahi hai
sava neze pe suraj aa raha hai
miri har samt galti ja rahi hai
mujhe dhar kar mere be-dar makan men
vo ghar ko haath malti ja rahi hai
ye kaise Dank hain siine men ‘tahir’
halaq men jaan uchhalti ja rahi hai
Leave a Reply