Musafiron Ka Kabhi Etibar Mat Karna

musāfiroñ kā kabhī e’tibār mat karnā

jahāñ kahā thā vahāñ intizār mat karnā

meñ niiñd huuñ mirī had hai tumhārī palkoñ tak

badan jalā ke mirā intizār mat karnā

meñ bach gayā huuñ magar saare ḳhvāb Duub ga.e

mirī tarah bhī samundar ko paar mat karnā

bahā lo apne shahīdoñ kī qabr par aañsū

magar ye hukm hai katbe shumār mat karnā

havā aziiz hai lekin ye us kī zid kyā hai

tum apne ghar ke charāġhoñ ko pyaar mat karnā

ye vaqt band darīchoñ pe likh gayā ‘qaisar’

maiñ jā rahā huuñ mirā intizār mat karnā

Leave a Comment