murjha.e hue phir gul-e-tar dekh rahi huun
na-qadri-e-arbab-e-hunar dekh rahi huun
phir chashm-e-taghaful se tiri hashr bapa hai
main gardish-e-dauran ki nazar dekh rahi huun
mizhgan pe larazte hue ashkon ke diye hain
vavasta-e-jan barq-o-sharar dekh rahi huun
kya husn-e-basarat men basirat ki kami hai
kuchh ahl-e-nazar chak-e-jigar dekh rahi huun
pindar-e-vafa tamkanat-e-hosh ḳhabar-dar
aflak pe dharti ke qamar dekh rahi huun
ab tak ye rivayat-e-kuhan jaag rahi hain
kuchh la.al-o-gohar ḳhak-basar dekh rahi huun
kuchh teri nigahon ne dikhaya hai tamasha
kuchh turfa zamane ka asar dekh rahi huun
tasḳhir-e-mah-o-mehr ke ba-vasf ‘aziz’ aaj
ujḌe hue ḳhamosh nagar dekh rahi huun
Leave a Reply