Mohsin Asrar
ḳhud hi taslim bhi karta huun ḳhata.en apni
aur tajviz bhi karta huun saza.en apni
koi dekhe to ada-kariyan karna us ka
band a.ine men karti hai ada.en apni
main suḳhan-var huun so ḳhamosh nahin rah sakta
main ne ankhon men basa.i hain sada.en apni
kya zamana tha ki ham ḳhuub jacha karte the
ab to mange ki si lagti hain qaba.en apni
maal hai paas na ham charb-zaban hain ‘mohsin’
shahr men kis tarah phir saakh bana.en apni
Leave a Reply