Muqarrar Kuchh Na Kuchh Ismein Raqibon Ki Bhi Sazish Hai

muqarrar kuchh na kuchh is men raqibon ki bhi sazish hai

vo be-parva ilahi mujh pe kyuun garm-e-navazish hai

pa-e-mashq-e-taghaful aap ne makhsus thahraya

hamen ye baat bhi min-jumala-e-asbab nazish hai

mita de khud hamen gar shikva-e-gham mit nahin sakta

jafa-e-yar se ye akhiri apni guzarish hai

kahan mumkin kisi ko baryabi un ki mahfil men

na itminan-e-koshish hai na ummid-e-sifarish hai

nihan hai dil paziri jis ke har har lafz-e-shirin men

ye kis jan-e-vafa ke haath ki rangin nigarish hai

kiya tha ek din dil ne jo dava-e-shakebai

so ab tak un ke naz-e-dilbari ko ham se kavish hai

hujum-e-yas ne be-dil kiya aisa ki ‘hasrat’ ko

tire aane ki ab ummid baaqi hai na khvahish hai

Leave a Comment