Munh Se Jo Kuchh Bolo Bhayya

muñh se jo kuchh bolo bhayyā

pahle us ko tolo bhayyā

bojh zarā kam ho jā.egā

yaad meñ un kī ro lo bhayyā

tanhā kab tak chalte rahoge

saath kisī ke holo bhayyā

ye galiyāñ badnām bahut haiñ

jald yahāñ se Dolo bhayyā

maiñ ne bhī ye siikh liyā hai

pyaar ho jis se bolo bhayyā

achchhā hai ye dard kisī kā

apne dil meñ samo lo bhayyā

der huī maiñ kaan dhare huuñ

darvāza to kholo bhayyā

Leave a Comment