mujh ko kahaniyan na suna shahr ko bacha
baton se mera dil na lubha shahr ko bacha
mere tahaffuzat hifazat se hain juḌe
mere tahaffuzat miTa shahr ko bacha
tu is liye hai shahr ka hakim ki shahr hai
us ki baqa men teri baqa shahr ko bacha
tu jaag ja.ega to sabhi jaag ja.enge
ai shahryar jaag zara shahr ko bacha
tu chahta hai ghar tira mahfuz ho agar
phir sirf apna ghar na bacha shahr ko bacha
koi nahin bachane ko aage baḌha huzur
har ik ne dusre se kaha shahr ko bacha
lagta hai log ab na bacha pa.enge ise
allah madad ko tu miri aa shahr ko bacha
tariḳh-dan likkhega ‘taimur’ ye zarur
ik shaḳhs tha jo kahta raha shahr ko bacha
Leave a Reply