Mujhe Jaana Hai Ek Din

mujhe jaana hai ik din teri bazm-e-naz se akhir

abhi phir dard tapkega miri avaz se akhir

abhi phir aag utthegi shikasta saaz se akhir

mujhe jaana hai ik din teri bazm-e-naz se akhir

abhi to husn ke pairon pe hai jabr-e-hina-bandi

abhi hai ishq par ain-e-farsuda ki pabandi

abhi haavi hai aql o ruuh par jhuti khudavandi

mujhe jaana hai ik din teri bazm-e-naz se akhir

abhi tahzib-e-adl-o-haq ki kashti khe nahin sakti

abhi ye zindagi dad-e-sadaqat de nahin sakti

abhi insaniyat daulat se takkar le nahin sakti

mujhe jaana hai ik din teri bazm-e-naz se akhir

abhi to kaenat auham ka ik kar-khana hai

abhi dhoka haqiqat hai haqiqat ik fasana hai

abhi to zindagi ko zindagi kar ke dikhana hai

mujhe jaana hai ik din teri bazm-e-naz se akhir

abhi hain shahr ki tarik galiyan muntazir meri

abhi hai ik hasin tahrik-e-tufan muntazir meri

abhi shayad hai ik zanjir-e-zindan muntazir meri

mujhe jaana hai ik din teri bazm-e-naz se akhir

abhi to faqa-kash insan se anhken milana hai

abhi jhulse hue chehron pe ashk-e-khun bahana hai

abhi pamal-e-jaur aadam ko siine se lagana hai

mujhe jaana hai ik din teri bazm-e-naz se akhir

abhi har dushman-e-nazm-e-kuhan ke giit gaana hai

abhi har lashkar-e-zulmat-shikan ke giit gaana hai

abhi khud sarfaroshan-e-vatan ke giit gaana hai

mujhe jaana hai ik din teri bazm-e-naz se akhir

koi dam men hayat-e-nau ka phir parcham uthata huun

ba-ima-e-hamiyyat jaan ki baazi lagata huun

main jaunga main jaunga main jaata huun men jaata huun

mujhe jaana hai ik din teri bazm-e-naz se akhir

Leave a Comment