Mohabbaten Jab Shumar Karna To Sazishen Bhi Shumar Karna

Noshi Gilani

mohabbaten jab shumar karna to sazishen bhi shumar karna

jo mere hisse men aai hain vo aziyyaten bhi shumar karna

jalae rakkhungi subh tak main tumhare raston men apni ankhen

magar kahin zabt tuut jaae to barishen bhi shumar karna

jo harf lauh-e-vafa pe likkhe hue hain un ko bhi dekh lena

jo raegan ho gaiin vo saari ibaraten bhi shumar karna

ye sardiyon ka udaas mausam ki dhadkanen barf ho gai hain

jab un ki yakh-bastagi parakhna tamazaten bhi shumar karna

tum apni majburiyon ke qisse zarur likhna vazahaton se

jo meri ankhon men jal-bujhi hain vo khvahishen bhi shumar karna