Mohabbat Mein Na Jaane Kyun Hamein Fursat Ziyaada Hai

Shaheen Abbas

mohabbat men na jaane kyuun hamen fursat ziyada hai

hamara kaam thoḌa hai magar mohlat ziyada hai

hamen is alam-e-hijran men bhi ruk ruk ke chalna hai

unhen jaane diya jaa.e jinhen ujlat ziyada hai

ye dil bahar dhaḌakta hai ye aankh andar ko khulti hai

ham aise marhale men hain jahan zahmat ziyada hai

so ham fariyadiyon ki ek apni saf alag se ho

hamara mas.ala ye hai hamen hairat ziyada hai

samajh paa.e nahin dekhe baghair us ka nazar aana

mashaqqat kam se kam ki thi magar ujrat ziyada hai

tamasha-gah charon samt se pur-shor hai ya.ani

kahin jalvat ziyada hai kahin ḳhalvat ziyada hai

tujhe halqa-ba-halqa khinchte phirte hain duniya men

so ai zanjir-e-pa yuun bhi tiri shohrat ziyada hai

ye saari amad-o-raft ek jaisi to nahin ‘shahin’

ki duniya men safar kam kam hai aur hijrat ziyada hai