mohabbat men ik aisa bhi maqam aata hai mushkil ka
jahan ḳhud dil hi ban jaata hai dushman hasti-e-dil ka
nazar kaisi ḳhayalon se hai uncha silsila dil ka
pata ḳhud puchhta hai ishq mujh se meri manzil ka
har ik karvaT pe dard-e-ishq ki taḌpa nahin jaata
kahan tak saath degi zindagi be-tabi-e-dil ka
miri ankhon men maujen hain miri nazron men tufan hai
safina mera parvarda nahin aghosh-e-sahil ka
miri zauq-e-ḳhalish ik mustaqil duniya-e-rahat hai
ki har ik ḳhaar pe hota hai dhoka mujh ko manzil ka
maze tanha.iyon ke bhi kabhi aate hain mahfil men
kabhi tanha.iyan bhi lutf de jaati hain mahfil ka
pila saghar nigah-e-mast se bhi kaam le saaqi
mujhe ehsas kuchh hone laga hai haqq-o-batil ka
agar samjho to har qatra mohabbat ki kahani hai
nahin ye ashk ik paigham hai TuuTe hue dil ka
sada-e-shauq-e-nazzara na saz-e-be-niyazi hai
bas ik naghma faza men gunjta hai parda-e-dil ka
tire dar par mujhe ye fitrat-e-majbur laa.i hai
na jaane aaj kis duniya men aalam hai mire dil ka
gham-e-pinhan ke parde men nashat-e-kamrani hai
zamane se alag haT kar zamana hai mire dil ka
junun ki azmaten mujh ko ‘munir’ aghosh men lengi
tavaf apni nigahen kar rahi hain us ki mahfil ka
Leave a Reply