Iftikhar Naseem
yuun hai tiri talash pe ab tak yaqin mujhe
jaise tu mil hi ja.ega phir se kahin mujhe
main ne to jo bhi dil men tha chehre pe likh liya
tu hai ki ek baar bhi paḌhta nahin mujhe
Dhalte hi shaam TuuT paḌa sar pe asman
phir mera bojh le gaya zer-e-zamin mujhe
ta.abir jagti hui ankhon ko kya mile
ik ḳhvab bhi to shab ne dikhaya nahin mujhe
kanda hai mera naam jahan aaj bhi ‘nasim’
pahchante nahin usi ghar ke makin mujhe
Leave a Reply