mohabbat dil pe karti hai asar ahista ahista
mariz-e-gham ko hoti hai ḳhabar ahista ahista
ḳhuda ab jaane kya anjam ho is sajda-rezi ka
ghisa jaata hai tera sang-e-dar ahista ahista
junun-e-ishq le aaya hai aḳhir dasht-e-ghurbat men
muqaddar ban ga.i gard-e-safar ahista ahista
kiya hai jumbish-e-lab ne mujhe behal kuchh aisa
main yuun to saans leta huun magar ahista ahista
ubhar aa.ega apne vasl ka ḳhurshid bhi ik din
magar hogi shab-e-gham muḳhtasar ahista ahista
bacha.un kis tarah kachche makan ko tez barish men
gire jaate hain sab divar-o-dar ahista ahista
nahin marta yakayak be-irada nazninon par
chhiḌakta huun main jaan un par magar ahista ahista
kisi ke duur rahne se mohabbat kam nahin hoti
magar barbad hota hai jigar ahista ahista
ghazab hai bazm men tera ye kaif-angez nazzara
hua jaata huun ḳhud se be-ḳhabar ahista ahista
mujhe karne laga hai ḳhanaman-barbad gham tera
vatan men ho gaya huun dar-ba-dar ahista ahista
umanD aa.i hai kyuun tarik shab atraf-e-alam par
kahan gum ho ga.e shams-o-qamar ahista ahista
‘muzaffar’ raaz poshida rahega kaise mahfil men
lahu Tapka rahi hai chashm-e-tar ahista ahista
Leave a Reply