mohabbat aur mohabbat ka shajar baaqi rahega
chale ja.enge ham lekin safar baaqi rahega
kisi dastak ki kanon men sada aati rahegi
koi naqsh-e-qadam dahliz par baaqi rahega
abhi se kyuun bujha den apne dil ki saari sham.en
sahar hone tak imkan-e-sahar baaqi rahega
baḌha aata hai sail-e-be-yaqini har taraf se
to is sailab men kya mera ghar baaqi rahega
girega ek din sar par ye niila asman bhi
duaon men bhala kab tak asar baaqi rahega
jo tum chaho to is bartan ko chakna-chur kar do
magar phir bhi nishan-e-kuza-gar baaqi rahega
abhi ye faisla mahfuz hai lauh-e-ufuq par
kaTegi kis ki gardan kis ka sar baaqi rahega
jise be-maslahat be-ḳhauf ho kar main ne likkha
vahi bas ek harf-e-mo’tabar baaqi rahega
mila hai TuuT kar jo muddaton ke ba.ad ‘ashfaq’
usi se phir bichhaḌ jaane ka Dar baaqi rahega
Leave a Reply