Jigar Moradabadi
mohabbat aap apni tarjuman hai
yahi khud chashm o dil lafz o bayan hai
nigahon men bahar-e-javedan hai
jahan main huun vahin ab ashiyan hai
mohabbat donon janib mehrban hai
ki ham us se vo ham se bad-guman hai
vo kab se muztarib hain ai gham-e-ishq
khuda jaane teri ghairat kahan hai
hamari rifaton ka puchhna kya
jahan ham paanv rakh den asman hai
koi avaz hi de gum-shuda dil
kahan hai o mire yusuf kahan hai
agar tu hai to ai jan-e-do-alam
yahan har shai javan javedan hai
maze soz-e-darun ke mil rahe hain
ba-hamd-o-lillah ki dil atish-ba-jan hai
tamasha didani hai dekh jaao
zaban-e-shauq o gulbang fughan hai
mubarakbad ai jazb-e-mohabbat
unhen apne par ab mera guman hai
kisi ko ik nazar hi dekh to len
ab itni bhi hamen jurat kahan hai
tire naqsh-e-qadam ka zarra zarra
ibadat-gah-e-jan-e-ashiqan hai
ilahi khair karna der se phir
bahut muztar nigah-e-razdan hai
phunka jaata hai dil jis soz-e-gham se
jahannam men ye chingari kahan hai
jo padh sakta hai to padh ai gham-e-dil
ki in nazron men aaj ik dastan hai
Leave a Reply