mitti tha main khamir tire naaz se utha
phir haft-asman miri parvaz se utha
insan ho kisi bhi sadi ka kahin ka ho
ye jab utha zamir ki avaz se utha
subh-e-chaman men ek yahi aftab tha
is aadmi ki laash ko eazaz se utha
sau kartabon se likhkha gaya ek ek lafz
lekin ye jab utha kisi eajaz se utha
ai shahsavar-e-husn ye dil hai ye mera dil
ye teri sar-zamin hai qadam naaz se utha
main puchh luun ki kya hai mira jabr o ikhtiyar
ya-rab ye masala kabhi aghaz se utha
vo abr shabnami tha ki nahla gaya vajud
main khvab dekhta hua alfaz se utha
shaer ki aankh ka vo sitara hua ‘alim’
qamat men jo qayamati andaz se utha