Abrar Ahmad
maan kahti hai
jab tum chhote the to aise achchhe the
sab abad gharon ki maaen
peshani par bosa dene aati thiin
aur tumhare jaise beton ki khvahish se
un ki goden bhari raha karti thiin hamesha
aur main tumhare hone ki rahat ke nashe men
kitni umren chuur rahi thi
ik ik lafz mire siine men atka hai
sab kuchh yaad hai aaj
ki main ik umr nigal kar baitha huun
umr ki akhiri sarhad ki banjar mitti
jab se maan ke honton se girte lafzon men kanpti hai
meri saans tadap uthti hai
us ke mitte naqsh mire andar
kohram si ik tasvir bane hain
zindagiyon ke khokhle ban par
ansuon lipti hansi mire honton pe larazti rahti hai
achchhi maan
umr ke chalte saae ki tazlil men
tere lahu ke ras ki lazzat
tere ghurur ki saari shaklen
un raston men mitti mitti kar aaya huun
pathrili sadkon pe apne hi qadmon se
khud ko raund ke guzra huun
mere lahu ke shor men teri
koi bhi pahchan nahin hai
teri ujli shabih kuchh aise dhundlai hai
tujh se vasl ki aankh se
binai zaail hai
main tere dardon ka maara
teri hi surat men bhi
ik jivan haara
Leave a Reply