minnaton se bhi na vo hur-shamail aaya
kis jagah aankh ladi haae kahan dil aaya
ham na kahte the na kar ishq pashiman hoga
jo kiya tu ne vo aage tire ai dil aaya
qahqahe qulqul-e-mina ne lagae kya kya
mujh ko masti men jo rona sar-e-mahfil aaya
qatl ki sun ke khabar iid manai main ne
aaj jis se mujhe milna tha gale mil aaya
ta dam-e-marg na ho vo mire dushman ko nasib
jo maza mujh ko ilahi dam-e-bismil aaya
marqad-e-qais par ab tak bhi to khar-e-sahra
ungliyon se ye batate hain vo mahmil aaya
ganj-e-qarun ke siva bhi hai adam men sab kuchh
haae duniya men na is mulk ka hasil aaya
jis ne kuchh hosh sambhala vo javan qatl hua
ahd-e-piri na tire ahd men qatil aaya
diin o duniya se gaya to ye samajh le ai ‘dagh’
ghazab aaya agar us but pe tira dil aaya
Leave a Reply