milta nahin mizaj ḳhud apni ada men hai
teri gali se aa ke saba bhi hava men hai
ai ishq teri dusri manzil bhi hai kahin
marna hai ibtida men to kya intiha men hai
laati hai jab saba to chamakte hain bam-o-dar
ye raushni si kya tiri bu-e-qaba men hai
har rahguzar nishan hai tiri samt ka magar
iqrar-e-na-rasi bhi har ik naqsh-e-pa men hai
tausif-e-husn asl men hai vasf-e-husn-e-saz
bandon se jis ko pyaar hai yad-e-ḳhuda men hai
ye tishnagi ye pas-e-vafa ye hujum-e-gham
kya karvan-e-shauq kisi karbala men hai
sun kar ki ‘hosh’ ne bhi kiya tark-e-arzu
kohram ik macha hua shahr-e-vafa men hai
Leave a Reply