junun pe aql ka saaya hai dekhiye kya ho
havas ne ishq ko ghera hai dekhiye kya ho
ga.i bahar magar aaj bhi bahar ki yaad
dil-e-hazin ka sahara hai dekhiye kya ho
ḳhamosh sham-e-mohabbat hai phir bhi husn ki zau
gulon se ta-ba-surayya hai dekhiye kya ho
shab-e-firaq ki baḌhti hui siyahi men
ḳhuda ko main ne pukara hai dekhiye kya ho
vahi jafaon ka aalam vahi hai mashq-e-sitam
vahi vafa ka taqaza hai dekhiye kya ho
gham-e-butan men kaTi umr aur ab dil ko
shikayat-e-gham-e-duniya hai dekhiye kya ho
hazar baar hi dekha hai sochne ka ma.aal
hazar baar hi socha hai dekhiye kya ho
mira shabab tira husn aur saya-e-abr
sharab-o-sher muhayya hai dekhiye kya ho
‘ziya’ jo pi ke na bahka vo rind-e-masti-kosh
piye baghair bahakta hai dekhiye kya ho
Leave a Reply