mile be-nishan ke nishan kaise kaise
bane la-makan ke makan kaise kaise
hue ḳhaak daur-e-jahan kaise kaise
hue hadse hain yahan kaise kaise
sune vasl men ham bayan kaise kaise
bahane kiye vo ayaan kaise kaise
qalaq hijr ke hain yahan kaise kaise
guman karte hain vo vahan kaise kaise
hai kis ka dahan vasf-e-lab men tumhare
suḳhnavar hue be-zaban kaise kaise
na shirin hi hai aur na laila hai afsos
jahan se ga.e qadr-dan kaise kaise
ka.i khate hain gham ka.i hain bala-nosh
hain is ḳhvan par mehman kaise kaise
gul-e-dagh-e-dil aah se kyuun na murjha.e
ujaḌe chaman ye ḳhizan kaise kaise
nasibon se ghar baiThe aa.e ho ai jaan
koi manta huun main haan kaise kaise
ye charḳh-e-kuhan aah chun-chun ke maara
tah-e-ḳhak hain naujavan kaise kaise
qayamat ke mazmun hain lahrate dil men
sadaf men hain bahr-e-ravan kaise kaise
miri ham-safiri bhi hai khapr teḌhi
hain ghup-chup hi shirin-bayan kaise kaise
mah-o-lala-o-sham.a ke daagh dekho
jale ishq se dud-man kaise kaise
hai kyuun vasf-e-yusuf ke jo karvan ka
jahan se ga.e karvan kaise kaise
ilahi ye kya gardish-e-asman hai
jalane lage mehrban kaise kaise
tasavvur se bhi dekhiye kyuun kamar ko
hijab aate hain darmiyan kaise kaise
har ik shaam chalte hain tir-e-nigah yaan
nikalte hain abru-kaman kaise kaise
chhua tha ki ik ghaat angiye ko un ke
hain tufan uThe al-aman kaise kaise
main qurban ḳhuda.i ke vo but jo puchhe
hain arman dil men nihan kaise kaise
karun mai se tauba main astaghfirullah
liye ahd-o-paiman mughan kaise kaise
amini hai jibril par garche qasid
hamen ho rahe hain guman kaise kaise
‘nasim’ un ki baḳhshish bhi la-intiha hai
hue jurm ham se ayaan kaise kaise
Leave a Reply