mil mujh se ai pari tujhe quran ki qasam
deta huun tujh ko takht-e-sulaiman ki qasam
karr-o-bayon ki tujh ko qasam aur arsh ki
jibril ki qasam tujhe rizvan ki qasam
tuuba ki salsabil ki kausar ke jaam ki
hur-o-qusur-o-jannat-o-ghilman ki qasam
ruhul-qudus ki tujh ko qasam aur masih ki
mariyam ke tujh ko iffat-e-daman ki qasam
tauret ki qasam qasam injil ki tujhe
tujh ko qasam zabur ki furqan ki qasam
tujh ko mohammad-e-arabi ki qasam hai aur
maula-ali ki shah-e-khurasan ki qasam
millat men jis ki tu hui us ki qasam tujhe
aur apne diin mazhab-o-iman ki qasam
daman ko meri haath se us raat mat jhatak
tujh ko sahar ke chak-e-gareban ki qasam
muddat se teri chah-e-zaqan men ghariq huun
billah mujh ko yusuf-e-kanan ki qasam
qaidi huun main tira ba-khuda-vandi-e-khuda
aur us aziz-e-misr ke zindan ki qasam
muusa ki hai qasam tujhe aur koh-e-tur ki
nur-o-farogh-e-jalva-e-laman ki qasam
nargis ki aankh ki qasam aur gul ke kaan ki
tujh ko sar-e-aziz-e-gulistan ki qasam
tujh ko qasam hai ghuncha-e-zambaq ke naak ki
aur shor-e-andalib-e-ghazal-khvan ki qasam
sone ki gaae ki qasam aur rud-e-nil ki
firaun ki qasam tujhe haman ki qasam
bistar mira hai khar-e-mughilan basan-e-qais
laila ki hai tujhe saf-e-mizhgan ki qasam
aisi badi qasam bhi na maane to hai tujhe
tujh ko usi ke shaukat-e-zishan ki qasam
dev-e-safed ki qasam aur koh-e-qaf ki
bagh-e-iram ki aur paristan ki qasam
lona-chamari ki qasam aur kallu-abir ki
kali-bala ki ghul-e-bayaban ki qasam
qasmen to saari ho chukin baaqi rahi hai ab
pipal tale ke bhutne ki shaitan ki qasam
haan phir tu kahiyo haae vo kis tarah hoe ghazab
‘insha’ na chhed mujh ko miri jaan ki qasam
Leave a Reply