tanha.i ta.amir karegi ghar se behtar ik zindan
bam-o-dar nahin honge lekin hoga jiine ka saman
kisi ḳhayal ki sarshari men jari-o-sari yaari men
apne-ap koi aa.ega aur ban ja.ega mehman
jivan paikar dhul ja.enge jis men gunah o savab samet
aansu paida kar hi denge aisi barish ka imkan
ashkon ki bunda-bandi men qaus-e-quzah ke rangon se
ik aisi tasvir bani hai saari duniya hai hairan
hairani zanjir karegi har pal na.i kahani ko
aur ‘zafar’ sab kirdaron men ik din paḌ ja.egi jaan
Leave a Reply