mil baithne ke saare qarinon ki khair ho
is karvan-sara ke makinon ki khair ho
thahrav paniyon men hai kitna ajiib sa
dariya ke khush-khiram safinon ki khair ho
har khvab ke safar men mire paanv ke tale
aa kar khisakne vaali zaminon ki khair ho
kar ek lamha sukh ka mire roz-o-shab ko daan
tere tamam saal mahinon ki khair ho
dam se unhi ke apne dar-o-bam hain buland
mere vatan ke khak-nashinon ki khair ho
Leave a Reply