Talib Baghpati
miri taqdir shikva-sanj daur-e-asman kyuun ho
mile jab dard men lazzat talash-e-mehrban kyuun ho
sharik-e-lazzat-e-azad koi ham-zaban kyuun ho
tumhin batlao ma.ani-ḳhez meri dastan kyuun ho
vahi dil hai vahi ḳhvahish vahi tum ho vahi main huun
miri duniya men aḳhir inqilab-e-asman kyuun ho
vo mere ba.ad rote hain ab un se koi kya puchhe
ki pahle kis liye naraz the ab mehrban kyuun ho
bagulon men uḌe jab ḳhaak mere ashiyane ki
qafas ki samt hi yarab hava-e-gulsitan kyuun ho
tumhen fariyad-ras kahte hain main fariyad karta huun
tumhen aḳhir batao phir ye koshish ra.egan kyuun ho
satana hi agar manzur hai kah do satate hain
miri taqdir ke parde men mera imtihan kyuun ho
hamen ma.alum hai ‘talib’ haqiqat raz-e-hasti ki
magar is be-haqiqat ki haqiqat hi ayaan kyuun ho
Leave a Reply