Jahangeer Nayab
meri nazar men us ki tab-o-tab aur hai
kahte hain jis ko gauhar-e-nayab aur hai
sarshar jis se ruuh ho vo giit hai juda
jo taar dil ka chheḌe vo mizrab aur hai
maqsud jo mujhe hai ye ta.abir vo nahin
jo dekhti hai aankh miri ḳhvab aur hai
khulte hain jis se logon pe asrar-e-be-ḳhudi
meri kitab-e-zist ka vo baab aur hai
hai zehn zindagi ke masa.il se muntashir
aur dil kisi ke ishq men betab aur hai
apni jagah pe donon hi ḳhush-rang hain magar
ta.us aur chiiz hai surḳhab aur hai
ye vaar bhi hadaf se kahin duur ja gira
tarkash men tiir kya koi ‘nayab’ aur hai
Leave a Reply