meri nava-e-shauq se shor harim-e-zat men
ghulghula-ha-e-al-aman but-kada-e-sifat men
huur o farishta hain asiir mere takhaiyyulat men
meri nigah se khalal teri tajalliyat men
garche hai meri justuju dair o haram ki naqsha-band
meri fughan se rustakhez kaaba o somnat men
gaah miri nigah-e-tez chiir gai dil-e-vajud
gaah ulajh ke rah gai mere tavahhumat men
tu ne ye kya ghazab kiya mujh ko bhi faash kar diya
main hi to ek raaz tha sina-e-kaenat men