meri iiza men khushi jab aap ki paate hain log
to mujhe kis kis tarah se aa ke dhamkate hain log
haath kya aata hai un ke kuchh nahin maalum kyuun
mujh ko tum se aur tum ko mujh se chhudvate hain log
ek to kuchh ji hi ji men ruk rahe hain mujh se vo
dusre ja ja ke un ko aur bhadkate hain log
mere un ke sulh az-bas khalq ko hai nagavar
vo to hain kuchh sard lekin un ko garmate hain log
raat aur din soch rahta yahi ‘rangin’ mujhe
main to sab se raast huun kyuun mujh se bal khate hain log