Mere Ilzam Sab Zamane Par

mere ilzām sab zamāne par

vo nahīñ hai mire nishāne par

pattharoñ se bhī ishq hotā hai

maiñ ne jaanā ye tujh ko paane par

ek bādal bahut hī royā thā

ek dariyā ke suukh jaane par

mujh ko āsān thā rulā denā

diqqateñ ā.eñgī hañsāne par

vaqt kī qaid meñ rahā itnā

panchhī uḌtā nahīñ uḌāne par

kis tarah kā hisāb hai ‘āqib’

ishq baḌhtā hai kyoñ ghaTāne par

Leave a Comment