haibat-e-husn se alfaz ki hairani tak
baat pahunchi thi abhi chand ki peshani tak
aap kya dirham-o-dinar liye phirte hain
ham to Thukra bhi chuke taḳht-e-sulaimani tak
vasl ke qisse to tamhid hain sunte rahiye
baat pahunchegi abhi quvvat-e-imani tak
qissa-e-rafta mukammal nahin hoga varna
zikr jaari rahe aqdar ki arzani tak
aap mohsin hain magar khel ki majburi hai
dil to aata hi nahin raah men sultani tak
us ne kuchh soch ke sahra ki taraf moḌ diya
pyaas bas pahunchne vaali thi abhi paani tak
daf.atan vaqt ne raftar baḌha di varna
bhagta main bhi raha ik had-e-imkani tak
Leave a Reply