Swapnil Tiwari
mere honTon ko chhua chahti hai
ḳhamushi! tu bhi ye kya chahti hai
mere kamre men nahin hai jo kahin
ab vo khiḌki bhi khula chahti hai
zindagi! gar na udheḌegi mujhe
kis liye mera sira chahti hai
saare hangame hain parde par ab
film bhi ḳhatm hua chahti hai
kab se baiThi hai udasi pe meri
yaad ki titli uḌa chahti hai
nuur miTTi men hi hoga un ki
jin charaghon ko hava chahti hai
mere andar hai ummas is darja
mujh men barish si hua chahti hai
bhor aa.i hai eraser ki tarah
shab ki tahrir miTa chahti hai
asman men hain sarabon ki si
jin ghaTaon ko hava chahti hai
chand ka phuul hai khilne ko phir
shaam ab shab ko chhua chahti hai
phir na lauTegi miri a.ankhon men
niind rangon si uḌa chahti hai
Leave a Reply