Mera Din KHubsurat Yun Bana Deta to Kya Hota

Poet

mira din ḳhubsurat yuun bana deta to kya hota

vo ham ko pyaar se aa kar jaga deta to kya hota

bahut va.ade kiye the aap ne to saath rahne ke

mohabbat men agar ik do nibha dete to kya hota

mira is shab ki tariki se dil bechain hota hai

ruḳh-e-anvar se vo parda haTa dete to kya hota

musavvir huun tasavvur aap ki tasvir hai mera

tumhen gar apni yadon se miTa dete to kya hota

main kab se muntazir tha aap ki nazar-e-karamat ka

jo lamhe bhar ko hi chehra dikha dete to kya hota

ajab ye shauq hai galiyon men teri roz aata huun

tiri rahon men hi ghar ko bana dete to kya hota

main apne zaḳhm ḳhud hi dekh kar ḳhud se ye kahta huun

vo hans kar Taal jaate hain saza dete to kya hota

hai un ki sha.iri ka bhi bahut charcha zabanon par

ghazal ham ko bhi vo ‘haidar’ suna dete to kya hota