Tahir Faraz
men na kahta tha ki shahron men na ja yaar mire
sondhi miTTi hi men hoti hai vafa yaar mire
koi TuuTe hue ḳhvabon se kahan milta hai
har jagah dard ka bistar na laga yaar mire
silsila phir se juḌa hai to juḌa rahne de
dil ke rishton ko tamasha na bana yaar mire
apni chahat ke shab-o-roz mukammal kar le
ja ye suraj bhi tire naam kiya yaar mire
tujh se milta huun to rishta koi yaad aata hai
silsila mujh se ziyada na baḌha yaar mire
aisa lagta hai ki kuchh TuuT raha hai mujh men
chhoḌ ke tu mujhe is vaqt na ja yaar mire
ḳhush-nasibi se ye saa.at tire haath aa.i hai
asman jhukne laga haath baḌha yaar mire
Leave a Reply