mehvar pe bhi gardish miri mehvar se alag ho
us bahr men tairun jo samundar se alag ho
apna bhi falak ho magar aflak se haT ke
ho bojh bhi sar ka to mire sar se alag ho
main aisa sitara huun tiri kahkashan men
maujud ho manzar men na manzar se alag ho
divar-e-numa.ish ki ḳharashon ka huun main rang
har lamha vo dhaga hai jo chadar se alag ho
us atish-e-afsun ko koi kaise bujha.e
jis aag men ghar jalta ho vo ghar se alag ho
chhatri rakhun us abr-e-siyah-gam ki ḳhatir
kuufi bhi na ho aur bahattar se alag ho
rab aur tamanna-e-dui vahm-e-bashar hai
ham-zad to kya aks bhi davar se alag ho
daman men vo duniya hai jo duniya se juda hai
aa.e vo qayamat bhi jo mahshar se alag ho
paare ki tarah shahr ka bikhrao hai ‘tafzil’
aisa koi batlao jo andar se alag ho
Leave a Reply