rafia-shabnam-abidi

May Ka Aag Lagata Hua Mahina Tha

may ka aag lagata hua mahina tha

ghata ne mujh se mira aftab chhina tha

baja ki tujh sa rafugar na mil saka lekin

ye taar taar vajud ek din to siina tha

use ye zid thi ki har saans us ki khatir ho

magar mujhe to zamane ke saath jiina tha

ye ham hi the jo bacha laae apni jaan de kar

hava ki zad pe tiri yaad ka safina tha

nadi khajil thi ki bhigi hui thi paani men

magar pahad ke mathe pe kyuun pasina tha

tum un sulagte hue ansuon ka gham na karo

hamen to rose hi ye zahr hans ke piina tha

tamam-umr kisi ka na ban saka ‘shabnam’

vo jis ko baat banane ka bhi qarina tha

More Poems

Leave a Comment