Maut

kaun avara havaon ka subuk-bar hujum

aah ehsas ki zanjir garan tuut gai

aur sarmaya-e-anfas pareshan na raha

mere siine men ulajhne lagi fariyad miri

phir nigahon pe umanD aaya hai tarik dhuan

timtimana hai mire saath ye mayus charagh

aaj milta nahin afsos patangon ka nishan

mere siine men ulajhne lagi fariyad miri

tuut kar rah gai anfas ki zanjir-e-giran

tod Dalega ye kambaḳht makan ki divar

aur main dab ke isi Dher men rah ja.unga

ji ulajhta hai miri jaan pe ban jaegi

thak gaya aaj shikari ki kaman tuut gai

laut aaya huun bahut duur se ḳhali hathon

aaj ummid ka din biit gaya shaam hui

main ne chaha bhi magar tum se mohabbat na hui

ki chuke ab to ḳhuda ke liye ḳhamosh raho

ek mauhum si ḳhvahish thi falak chhune ki

zang-alud mohabbat ko tujhe saunp diya

sard hathon se miri jaan mire hont na si

gar kabhi laut ke aa jaae vahi sanvli raat

ḳhushk ankhon men jhalak aae na be-sud nami

zalzala uf ye dhamaka ye musalsal dastak

be-aman raat kabhi ḳhatm bhi hogi ki nahin

uf ye maghmum fazaon ka alamnak sukut

mere siine men dabi jaati hai avaz miri

tirgi uf ye dhundlaka mire nazdik na aa

ye mire haath pe jalti hui kya chiiz giri

aaj is ashk-e-nadamat ka koi mol nahin

aah ehsas ki zanjir-e-giran tuut gai

aur ye meri mohabbat bhi tujhe jo hai aziiz

kal ye maazi ke ghane bojh men dab jaegi

kaun aaya hai zara ek nazar dekh to lo

kya ḳhabar vaqt dabe paanv chala aaya ho

zalzala uf ye dhamaka ye musalsal dastak

khatkhatata hai koi der se darvaze ko

uf ye maghmum fazaon ka alamnak sukut

kaun aaya hai zara ek nazar dekh to lo

tod Dalega ye kambaḳht makan ki divar

aur main dab ke isi Dher men rah ja.unga

Leave a Comment